TACLOBAN CITY – Nag-umento an presyo han bunay ha mga kamerkaduhan dire la ha syudad kundi hasta gihapon ha iba nga lugar hiton rehiyon.
Sumala kan Dioscoro Gasatan Jr., Senior Agriculturist hiton Agri-Business and Marketing Assistance Division hiton Department of Agriculture Regional Office VIII, kumpara han mga nakalabay nga bulan in nagkamay-ada hin pagkiwa ha presyo han bunay ha mga merkado ha rehiyon yana nga katapusan nga bulan hiton tuig.
An nasabi nga paghitaas han presyo in mahitungod han kakulangan han suplay han bunay ngan han kadako han demand han nasabi nga produkto.
Ha pamakiana naman daw han mga ine han rason han pagkulang han suplay, ine daw mahitungod nga kun pananglitan an ira gin oorder nga bunay in ada ha 6,000 ka-trays, an nahahatag la han supplier in ada la ha 4,000 sanglit dire daw ine nakakainsakto.
Ha pagkayana, an pamresyuhan han small size nga bunay in ada ha P260 kutob P270 kada tray; medium size ha P270 ngada ha P280; large size ha 280 ngada ha P290; XL size ha 290 ngada ha P300; ngan an jumbo size naman in ada ha P300 ngada ha P310 an kada tray.
