TACLOBAN CITY – Nakaeskapo an usa nga preso han Northern Samar Provincial Jail ha Barangay Dangkalan, Bobon Northern Samar.
Ginkilala an pugante kan Rosendo Fernandez, 29 anyos an pangidaron ngan residente han Barangay Balat-balud, han mao nga bungto.
Sumala kan PCapt. Ricardo Banjawan, Acting Chief of Police han Bobon PNP, nga gabi han makatakas ini pinaagi hin pagruba han alkuba ha sakob han ira selda kun diin didto ini nag agi agud nga makagawas ha presohan.
Nahibaruan nga an mao nga pugante in may kaso nga pagtalapas han RA 6539 o Anti-Carnapping Act of. 1972 ngan sugadman murder.
Ha pagkayana in nagpapadayon an gindudumara nga manhunt operation han mga kapulisan sugad man mga jail guards agud nga madakop an mao nga suspek.
Magdudumara naman hin imbestigasyon an Bobon PNP kun nagkamay-ada ba hin kapabay-an ha panig han mga nakaduty nga jail guards rason para matakasan an mga ini hin usa nga preso.
