TACLOBAN CITY– Nagpahimatngon an National Telecommunication Commission NTC-8, ha publiko kasumpay ha paghurak hiton text scam, ngan love scam, yana nga tikaharani na an bulan hiton Pebrero.
Sumala kan Willie Zabala, Regional Director National Telecommunication Commission NTC-8, ine in ha kaluyo, nga waray pa hira may nakakarawat nga report kasumpay ha scam problem.
Mayda naman hira nakarawat, nga reklamo sugad hiton pagpa-block hiton mga nagkawawara nga cellphone.
Utro nga nanindugan an NTC-8, nga gawas han ira trabaho an magpasaka hin kaso ha mga na-scam kontra ha mga scammers.
Dugang pa hine, an may full authority nga mag block hiton mga numero in adton mga telcos, ngan an buhatan naman hiton NBI an may katungod nga magpasaka hin kaso ala-kontra ha mga scammers.
Padayon naman an ira panawagan ha publiko, nga makipagsumpayan ha ira buhatan, partikular na kun mayda makit-an ngan mahibaruan nga nagbabaligya hiton mga simcard nga rehistrado na.
