TACLOBAN CITY – Gintagan hin duon han Police Regional Office 8 (PRO 8) nga magpapadayon la gihapon an ira imbestigasyon bahin han nahitabo nga shootout ha Calbayog City ha kaluyo han pagbubuhaton nga kalugaringon nga imbestigasyon han National Bureau of Investigation (NBI).
Sumala kan Pol. Lt. Col. Ma. Bella Rentuaya, tagapagyakan han PRO 8, nga ha pagkayana in natikangan na an pagkuha hin pahayag han mga dabi ha mao nga insidente tikang ha kampo han Samar PDEU ngan mga kapulisan sugadman an mga civilian witnesses.
Ginsiguro naman hini nga waray matatabo nga white wash ha ira imbestigasyon agud nga matagaan hin hustisya an pagkamatay dire la han kampo ni Mayor Aquino kundi pati na gihapon han mga pulis nga namatay.
Nahibaruan naman nga ha pagkayana in nadugngan pa an ihap han mga namatay ha insidente mahuman nga maawatan na hin kinabuhi an duha nga naitala nga samaran nga hira Mansfield Labonete, usa ha mga security aide ni Mayor Aquino ngan an sibilyan nga hi Clint John Paul Yauder.
