TACLOBAN CITY – Talwas na ha toxic red tide an pipira nga kadagatan ha Eastern Visayas.
Basi ha pinakabag-o nga Shellfish Bulletin No. 35 han Bureau of Fisheries and Aquatic Resources o kun BFAR nga talwas na an kadagatan han Cambatutay Bay ha Western Samar, Cancabato Bay ha Tacloban City, mga coastal waters han Calubian , Leyte, Leyte, ngan kadagatan ha probinsya han Biliran.
Samtang base ha pinakabag-o nga laboratory results han BFAR ngan LGU’s, nagpapabilin naman nga positibo ha paralytic shellfish poison o red tide an Iron- Irong Bay, Maqueda Bay, Villareal Bay, coastal waters han Daram Island ha Western Samar, Matarinao Bay ha Eastern Samar ngan Carigara Bay ha Leyte.
Sumala ha BFAR nga tanan nga shellfish nga nakuha ha mga lugar in diri talwas para ha human consumption. Kun makaon naman hin isda ngan iba pa nga laman dagat in talwas kaunon pero kinahanglan hugasan ngan lutuon hin maupay.
Padayon la gihapon an gindudumara nga check point han BFAR ha may San Juanico bridge agud mabantayan nga waray makakasulod nga shellfish nga tikang ha mga lugar nga positibo han redtide.
