Padayon an pag-orient ngan paghatag hin refresher course han Tacloban City Traffic Operations Management and Enforcement Command o TOMECO ha ira mga personnel agud mapakusog an ira hibaro ha balaud-trapiko ngan igo nga pagpatuman hini ha kalsada.
Sumala kan Restutito Reglos, Operation and Enforcement han TOMECO, kaparte ini han ira regular nga orientation nga gindudumara kada semana para ha 15 nga TOMECO personnel agud ma-enhance an ira mga abilidad ha pagpatuman han balaud.
Lakip ha ginhihisgutan ha orientation an igo nga pamaagi han pag-flag down, pagdakop, pag-isyu hin ticket, pagsurat han mga detalye han violation, ngan igo nga pakig-istorya ha mga nadadakop tungod han ira mga pagtalapas ha balaud-trapiko.
Ginpahayag ni Reglos nga importante nga ma-equip an mga personnel, labi na kay diri pareho an batasan ngan reaksyon han mga tawo nga ira gindadakop o gin-iisyuhan hin ticket. Sanglit, kinahanglan magpabilin an composure ngan propesyonalismo han TOMECO personnel komo mga empleyado han gobyerno.
Dugang pa niya, kinahanglan liwat nga sakto ngan kompleto an mga impormasyon nga iginsusurat ha ticket, upod an eksakto nga violation, agud malikyan an kakulangan ha entry. Samtang, ginpaangbit ni Reglos, nga kun diri mabayaran o tuyuon nga diri bayaran an nasabi nga violation, posible ini umabot ha korte.
