TACLOBAN CITY–Ginuhuhulat han pira ka mga negosyante an update tikang ha Department of Public Works and Highways (DPWH) kasumpay ha patapod hine nga papahitas-an an kapasidad hiton load limit nga makakatabok nga sarakyan ha San Juanico Bridge.
Mahuma ini an nakatalaan unta nga pagtikang nga pag-gios ha load limit ha mao nga tulay yana nga Disyembre.
Sumala kan Colai Co, Information Officer han TFCCCI ngan Chairman han Brgy. 41 Tacloban City, ginlalauman nira nga mayda maupay nga resulta an patapod han nasabi nga buhatan matungod nga Disyembre na.
Dugang hine, basar ha iya obserbasyon, kinahanglan nga kitaon in maupay kun pwede na himuon na nga two-way an pag-tabok ha San Juanico Bridge, agud nga dire ine humagos hin 1 ka oras ha pagtabok la hiton tulay.
Ginmalatumat ni Co, possible gihapon ine nga makabulig nga mapahamubo an presyo han mga papliton matungod nga mapapadagmit na an pagtabok ha tulay.
Mababaruan nga nalilimitaran an produkto nga gintatabok ha San Juanico, ngan nadadamay an pampresyuhan han mga ine matungod na gihapon nga nagigin limitado la an suplay.
