TACLOBAN CITY – Gin kondina han ahensya han 20th Infantry Battalion ha 8th Infantry Division Philippine Army an samok nga ginhahatag han communist terrorist group nga gin dudurot han New People’s Army ha Northern Samar.
Ine in kasumpay han pagkamatay han duha nga construction worker durot han pagbuto han anti-personnel mine nga ginbutang ha ligid han karsada ha Brgy. Magsaysay, Las Navas Northern Samar dida han nakalabay nga adlaw.
Ginkilala an duha nga namatay kanda Rowel Lebico ngan Hersan Cabe, parehas residente han Brgy. Quirino Las Navas Northern Samar.
Subay ha impormasyon, nasabi nga mga biktima in trabahador han ginhihimo nga farm-to-market road nga ginlalauman nga magkokonekta ha mga tay-aw ngan hagrayo nga lugar ha bungto han Northern Samar.
Sakay naman han ira motorsiklo an mga biktima han bumuto an nasabi nga anti-personnel mines nga daw ginbutang han mga rebelde ha ligid han karsada. Nagawas gihapon ha imbestigasyon nga nag-angkon hin samad ngan igo hin bala an lawas han mga biktima mahuman an nasabi nga insidente.
Nagbug-os naman hin fact-finding mission an lokal nga pangobyernuhan han Las Navas para imbestigahan an nasabi nga insidente nga kasuhan an mga angay kasuhan kadungan na gihapon han hangyo nga hustisya han mga ginbyaan nga pamilya han mga biktima.
Samtang, nagdudumara na gihapon hin lain nga imbestigasyon an Northern Samar Police Provincial Office kasumpay han nasabi nga insidente.
