TACLOBAN CITY – Umabot na ha 11 an ihap han mga persons under investigation (PUIs) ha Eastern Visayas kasumpay han posible nga 2019 novel coronavirus infection.
Sumala kan Dr. Minerva Molon, Regional Director han Department of Health (DOH) Region 8, ha ira pinakaurhi nga datus naidugang ha mao nga ihap an upat nga mga indibidwal nga may history hin pagbiyahe ha China ngan Hongkong.
Ini in ginkakalakipan hin usa nga 30 anyos nga OFW tikang China nga nakaabat hin kakuri ha pagginhawa, 36 anyos nga Amerikano nga nakaabat hin spion ngan ubo, 11 anyos nga babaye nga naka-eksperyensya hin hiranat ngan usa nga 31 anyos nga babaye nga dati nga person under monitoring (PUM) nga nagkaada hin direkta nga kontak ha usa nga PUI.
An mao nga mga PUIs in nakapailarom na yana ha 14 days quarantine ha Eastern Visayas Regional Medical Center (EVRMC).
Ginklaro naman han mao nga opisyal nga ha 11 nga mga PUIs ha rehiyon duwa dinhi in nadischarge na tikang ha EVRMC ngan usa naman tikang ha provincial hospital mahuman nga mag negatibo ha 2019 novel coronavirus.
Utro naman nga gintagan hin duon han DOH nga waray sadang ikabaraka an publiko ha padayon nga paghitaas han mga PUIs ha rehiyon tungod nga ini in mas maupay lugod agud nga maipalarom dayon an mga ini ha isolation ngan quarantine ngan dire na makatapon pa ha iba nga mga tawo.
