TACLOBAN CITY – Naghatag hin pinansyal bulig an Philippine Coconut Authority Regional Office 8 ha pamilya hiton biktima nga namatay mahuman nga matumbahan hin puno hin lubi ha Brgy. Sto. Niño, Macrohon Southern Leyte.
Sumala kan Joel Pilapil, General Manager han Philippine Coconut Authority Regional Office 8, naghatag hin gutiay nga pinansyal nga bulig an ira ahensya ha pamilya hiton biktima nga usa nga chainsaw helper.
Dugang pa hine, nakipagsumpayan na hira ha central office hiton ira ahensya para matagan hin kadugangan nga bulig an pamilya hiton biktima.
Manunumduman nga naawat an kinabuhi hiton biktima nga hi Evangel Amper dida han Setyembre 3 mahuman nga matumbahan ine han lubi samtang nagdudumara hira hin clearing operation ha mao nga barangay.
