TACLOBAN CITY– Naghatag hin pagklaro an Confederation of Irrigation Association, kasumpay han pagdestribwer han mga patubig ha mga irigasyon han mga para parag-uma ha probinsya hiton Leyte.
Sumala kan Adolfo Olaya, Confederation of Irrigation Association Province of Leyte, nga nagkamayda hira hin organization meeting kaupod hiton National Irrigation Administration (NIA-region 8), kun diin napagkasaragbutan, nga unahon nga tagan hin suplay hiton tubig an mga katapusan nga irigasyon, matungod han kapaso nga na-aabat.
Dugang pa hine, kadam-an ine umabuyon ha nasabi nga kasaragbutan, pero an ira concern ha pagkayana an suplay hiton tubig, matungod nga dire ine nakakadalagan hin maupay para ha sapit nga mga barangay.
Ginpaangbit pa hine, nga pananglitan naman naka-schedule an mga parag-uma para hiton ira tanuman, in makig-kooperar an mga ine ha ira buhatan, ngan dire papasagdan la an nasabi nga association nga gumios.
Naghahangyo ine ha tanan nga mga parag-uma, nga bumulig panginano agud nga mahibaro an mga ine kun anu iton aktwal nga natatabo kun kay-anu nadedelatar an pan-distrebwer hiton patubig ha mga humayan.
Aminado naman ine, nga tungod hiton kapaso han panahon an rason kun kay-anu nakaka-abat hin paghubas ngan kakulangan hiton suplay han tubig.
