TACLOBAN CITY – Patay na han mahikit-an iton lawas han usa nga lalaki ha may Brgy. Atipolo Jaro, Leyte.
Ginkilala an biktima kan Jo Arwin Polartem residente han Brgy. Canhandugan Jaro, Leyte.
Sumala kan PMaj. Ronald Puso, Chief of Police han Jaro Municipal Police Station, patay na han makit-an an biktima han mga nakaupod hine paghunting han wild boar.
Basar han inisyal nga imbestigasyon han kapulisan in dida han Nobyembre 1 han alas 7 han aga, kaupod an iya upat nga kasangkayan in naghunting daw an mga ine hin wild boar ha kabukiran han Brgy. Atipolo. Ha kaparehas naman nga adlaw dida han kulop in waray an daw magkadurungan pag uli an mga ine ngan nahibilin ha mao nga lugar an biktima. Gin balik naman daw han mga ine an biktima pagkakinabuwasan pero patay na ine han ira pag-abut.
Nag-angkon naman hin injury an biktima kun diin mayda ine samad ha iya sugbong ngan tiyan nga rason han kaawat han iya kinabuhi.
Hapagkayana, padayon pa an ginbubuhat nga imbestigasyon kasumpay ha mao nga panhitabo.
