TACLOBAN CITY — Personal nga away an motibo han pagtibasa-patay han usa nga parag-uma han iya igkasi nga parag-uma ha Sitio Purihay, Brgy. Dapdap, bungto han Alangalang, Leyte.
Ginkilala an biktima nga hi Roger Piador Abadines, 50 anyos an pangidaron samtang an suspek naman in ginkilala nga hi Ronelo Baldesco Ayo, 52 anyos an pangidaron ngan pareho mga residente han mao nga lugar.
Basar ha inisyal na imbestigasyon han mga kapulisan nga nakada ha sakob han ira panimalay an biktima han gin- ayat ini hin away han suspek nga nakainom ngan ginpaninigbas an biktima gamit an usa nga sundang.
Nag angkon hin samad ha li-og ngan ulo nga parte an biktima nga naging rason han dayon nga kamatayon hini.
Dayon naman nga nadakop an suspek ngan ha pagkayana in nakapaslak na ha Alangalang PNP custodial facility ngan maatubang ha kaso nga Homicide.
