CATBALOGAN CITY – Gin hold-up hin tulo nga kalalakin-an an usa nga terminal hin pampasaheros nga van ha Brgy. 3 Catbalogan City dida han nakalabay nga adlaw kun diin usa an nahipatik nga patay.
Ginkilala an mga suspek kanda Robert Soriano, taga-Mandaluyong City; Paterno Macara alyas Jerry Labrague, residente han Jiabong Samar; ngan Gerardo Pelaez, taga-Pangasinan.
Sumala kan Catbalogan City Police Station Chief of Police, PLt. Col. Normal Ala, ugsa an panhitabo in nagminan-manon anay an mga suspek ha terminal agud masigurado nga waray pulis o anuman nga otoridad nga bantay ugsa ini sumulod nga nagdeklara hin hold up.
Gin pirit han mga suspek an kahera nga naka-duty nga ighatag an kwarta nga halin ngan an cellphone hini. Nagpabulig naman an kahera ha iya mga agarun nga nakadto han ira opisina, kun diin natuman gihapon nga nakit-an han mga ini an panhitabo pinaagi han CCTV.
Waray naman dayun makigbalyuay hin buto an mga agarun, lugod gin sigurado anay an lugar nga waray iba nga madadabi. Dida han kasigurado na han lugar in amu na an pagpabuto han mga agarun ngadto ha mga suspek kun diin duha ha mga ini an naigo.
Gin dara naman an duha nga suspek ha Samar Provincial Hospital pero gin deklara an usa nga patay na, samtang an usa naman in gin balhin ha Eastern Visayas Medical Center ngan padayon pa nga nagpapaupay hasta yana. An ikatulo naman nga suspek in temporaryo nga naka-iskapo tikadto ha may Jiabong nga area, pero usa nga concerned citizen an nagtawag ha kapulisan nga mayda nira gin-uusa nga tawo sanglit gin kadto ini nira.
Pag-abot ha lugar, dida han madaop unta an otoridad in dumalagan ngan nagprubar pagpabuto an suspek pero waray dayun bumuto an pusil hini sanglit dumalagan ini tikadto ha may mabukid nga lugar.
Gin halpat naman ini han kapulisan, kun diin nagpabuto utro an suspek, bumulos naman an kapulisan, ngan didto na naigo an suspek.
Gindara pa ini ha hospital pero waray na ini umabot in ginbawian na ini hin kinabuhi. Gindeklara naman ini nga dead-on-arrival han attending physician.
Ha lain nga bahin, nakuha ha mga suspek an magkadiru-dilain nga armas: usa nga pisaw, usa nga calibre .45, ngan usa nga calibre .38.
