TACLOBAN CITY – Nagpapadayon an gindudumara nga Step 2 registration para han PhilSys ID System ha Sinirangan Bisayas yana nga tuig.
Target mangud han Philippine Statistics Authority PSA Regional Office 8, nga mairehistro an maabot ha 26,040 nga mga individwal ha bug-os nga rehiyon han nakalabay nga Abril, pero basar ha ira datos as of April 30 in aada pala ini ha 14,217.
Sumala kan Anesia Babante, Chief Administrative Officer ngan Focal Person hitun PhilSYS ID han Philippine Statistics Authority Region 8, nga gintatalinguha nira yana nga makab-ot an nasabi nga ihap o di man ngani in malangpusan pa an ira target nga mairehistro samtang mayda pa daw hira pondo.
Basar ha datos in nangunguna ha mayda pinakadamo nga nairehistro in an Probinsya han Leyte, nga mayda na 4,622 nga kun diin, an ira target in aada ha 5,460.
Northern Samar, nga mayda na 3,967 ha target nga 5,880, Samar, nga mayda pala 2,286 ha 6000 nga target ,Southern Leyte nga mayda na 1,600 ha target namna nga 3780, Biliran nga mayda na 906 ha target naman nga 2,100 ngan an Eastern Samar nga mayda pala 820 ha target naman nga 2,520.
An Step 2 registration han PHILSYS in ginkakalakipan han pag fingerprint, pag signature, pagkuha han mata ngan iba pa.
Gin aaghat naman ni Babante, nga bisitahon na ha pinakahirani nga registration area, agud nga mairehistro an personal information han kada indibidwal, ngan dire mahingalimot pagdara han ira Birth Certificate.
