Gintagan pagklaro han Department of Justice nga presente nga ginhahangyo pala ha Anti-Money Laundering Council an pag-iisyu hine hin freeze order kontra ha mga nahilakip ha listahan han mga dabi ha maanomaliya nga flood control projects.
Iginpahayag mismo ni Justice Sec. Jesus Crispin ‘Boying’ Remulla nga an 21 nga indibidwal nga iginrerekomenda nga makasuhan han National Bureau of Investigation in an ginhangyo agud maisyuhan hin ‘freeze order’.
Karuyag sidngon, ha presente in ginhuhulat pa an pinal nga kumpirmasyon kun mayda na gud ba naipagawas nga freeze order kontra ha mga indibidwal nga dabi ha kontrobersiya.
Pagduon manggud ni Justice Secretary Remulla, ha oras nga maisumite o maipadara ha Anti-Money Laundering Council an nasabi nga hangyo in dayun ine nga igkokonsidera nga human.
Kaupod naman ha mga ginlalauman nga maiisyuhan han nasabi nga freeze order in hira Ako Bicol Party-list Rep. Zaldy Co, Senador Joel Villanueva, Jinggoy Estrada, Chiz Escudero, ex-Sen. Bong Revilla, former DPWH USec. Roberto Bernardo, Engr. Brice, ngan iba pa.
