TACLOBAN CITY – Nakakapagpaubos ha kredibilidad han justice system han gobyerno an naging desisyon han National Prosecution Service (NPS) nga pag-aabswelto ha kaso han mga gintutuuhan nga big time drug lords nga hira Kerwin Espinosa, Peter Lim ngan Peter Co.
Ini an naging pamahayag ni Atty. Leo Giron, Presidente han Integrated Bar of the Philippines Leyte Chapter.
Sumala kan Atty. Giron, may partiality an naging desisyon sanglit baga-baga hin nawawarayan na kredibilidad ngan pagtuo ha justice system han nasud.
Dugang pa hini nga usa nga dako nga pakiana kun kay-ano nga bisan man kun klaro na ngan umamin na gihapon hi Kerwin Espinosa ha iya pagkakadabi ha ilegal drug trade in diri la gihapon sadang an ebidensya hini sumala ha DOJ ngan kun ikokompara naman ha mga ubos nga drug personalities in dayon napapasakahan hin kaso nga nacoconvict.
Gintagan gihapon hin duon ni Atty. Giron nga dako iton epekto hini ha publiko nga posible nga magdurot hin kawaray pagtuo han mga ini ha sistema han hustisya ha nasud.
