TACLOBAN CITY – Gin panhimuwa han Information Officer han Leyte National High School nga nagkamay-ada hira hin aragmot nga nagkakantidad hin P600.
Sumala kan Bernie Jude Lamograr, Information Officer han Leyte National High School dire tinuod an aragmot nga P600 kun diin sumala han nagreklamo in igbarayad daw ine ha tubig ngan kuryente han iskuylahan.
Dugang pa niya, P170 la an gin aragmutan han mga kag-anak nga nagmeeting ha usa nga klase ngan ine in dire daw mandatory o required haira. Boluntaryo la an paghatag ngan igkokonsidera ine nga donation han mga kag-anak ha classroom han skwelahan.
An makokolekta naman daw nga kwarta in igpapalit hin mga panginahanglan ha sulod han classroom sugad han electric fan.
Ginyakan gihap hine nga waray daw mag-atender han nasabi nga meeting adton nagreklamo.
Nagpahimatngon naman ine ngadto han mga kag-anak nga mag-atinder hiton meeting kun nagpapatawag an mga maestra para maklaruhan ngan mahisabutan nira an ginkakasarabutan ha sulod han classroom.
