Ginkokonsiderar an Ormoc City nga mag-host han 2027 Batang Pinoy National Championships, samtang ginpapakusog han Philippine Sports Commission (PSC) an pagdumara hin dagko nga nasyonal nga mga kompetisyon ha gawas han Metro Manila.
Sumala kan PSC Chairman John Patrick Gregorio, an padayon nga pag-uswag han mga sports facilities ha Ormoc amo an usa han mga hinungdan nga naghihimo han syudad nga maupay nga kandidato para ha pag-host han pinakauna nga grassroots sports competition ha nasud.
Iginpresentar ni Gregorio an suhestyon kan Leyte Fourth District Representative Richard Gomez ngan Ormoc City Mayor Lucy Torres-Gomez. Dugang pa niya, andam an PSC maghatag hin pinansyal nga bulig kon makakarawat han Ormoc an katungod ha pag-host han torneo.
Ginpabug-atan ni Gregorio nga damu han mga magkarit nga atleta han nasud in tikang ha mga probinsya. Sanglit, importante nga padayon nga suportahan ngan pauswagon an grassroots sports ngan an pagpadukwag han mga atleta ha mga rehiyon.
Ginpahayag ni Gomez nga padayon an paningkamot han Ormoc nga magin sentro han sports ha Eastern Visayas pinaagi han padayon nga pamuhunan ha mga sports facilities.
Dugang pa niya, ginlalauman nga matatapos ha ikaduha nga bahin han tuig 2027, an P110 milyon nga track-and-field facility ha Ormoc City Sports Complex ha Barangay Juaton. Sumala naman kan Mayor Torres-Gomez, an mga programa han syudad ha sports development in gintutuyo nga magin ehemplo ha iba pa nga lokal nga pangobyernuhan agud mapadig-on liwat an ira grassroots sports programs.
