NATIONAL – Nakatalaan nga magsalawad hin reklamo ha Commission on Elections (Comelec) an Gabriela Women’s Party-list ngan iba pa nga women’s rights organization kontra ha National Task Force to End Local Communist Armed Conflict (NTF-ELCAC).
An reklamo in mahitungod ha daw partisan political activities han NTF-ELCAC ngan an pagsusumpay han mga ine ha pira nga kongresista ngan partido han insurgent groups.
Kakulop in nagsalawad gihapon an Makabayan Bloc hin complaint ha poll boday mahitungod han naeksperyensyahan nga nga red tagging ngan harassment samtang nagdudumara han ira kampanya.
Ginmalatumat naman ni Comelec Chairman George Garcia nga ginkokonsidera nira nga seryoso nga istoryahon an mga nakakarawat nga sugad nga reklamo.
Ha ilarom han Comelec Resolution No. 11116, kaupod ha mga igindidire an red-tagging ha mga indibidwal ngan mga grupo.
Bawal gihapon an diskriminasyon ha mga kababayen-an, persons with disabilities, mga membro hin cause-oriented groups, ngan an paghan-ay ha mga indibidwal, grupo o organisasyon ha mga terorista kun waray naman ebidensya.
