TACLOBAN CITY – Nagkamayda hin inisyatibo nga pamaagi an buhatan hiton National Irrigation Administration Regional Office VIII, ine in an rotational operation distribution han tubig para han mga irigasyon ha pira nga mga Munisipalidad dinhe ha rehiyon, ine in kumo baton ha pagsulod han El Niño season.
Sumala kan Karen Cerilla Mades, Public Relation Officer National Irrigation Administration Regional Office VIII, nga supresyente an suplay han tubig yana nga croping season, ilabi na nga nagtitikang na pagbutho an El Niño season matungod nga gin-aabat na hiton ngatanan an kapaso hiton panahon partikular na ha grupo hiton mga parag-uma.
Dugang pa han mao nga opisyal, nagkamayda na hin inisyal nga distribusyon an ira ahensya ngan ine in ha Abuyog Leyte, matungod nga hira an syahan nga nagkamayda hin 100% nga harvest yana nga tuig.
Samtang, para naman ha iba nga mga Munisipalidad in magtitikang an mga ine ha bulan hiton Mayo, ngan maghuhuman naman ine ha bulan hiton Hunyo yana nga presente nga tuig.
Gintagan naman hin duon han mao nga opisyal, nga igpapabilin han ira buhatan an pagsunod han Calendar activity hiton pananom nga usa ha mga ginpapatuman han mao nga ahensya.
Naghatag naman ine hin patapod an mao nga opisyal ha mga parag-uma, nga dire an mga ine mabaraka matungod nga mayda ginhihimo nga pamaagi an buhatan hiton NIA-8 para ha ira.
