NATIONAL – Gin ayat ni National Bureau of Investigation (NBI) Director Jaime Santiago hi aLyas Totoy nga ngaranan an personnel han ahensya nga daw may kalabutan ha pagkawara han damo nga mga sabungeros.
Syahan na nga ginmalatumat han kontrobersyal nga whistleblower an daw pagkakadabi han pira nga personnel han NBI, ha isyu han missing sabungeros, kaupod an mga pulis, ngan pira nga dagko nga personalidad.
Duon pa ni Dir. Santiago nga dire makakagtikang an kaso kun waray mga partikular nga ngaran o pangilal-an.
Kun madire daw hi alyas Totoy nga magyakan hin ngaran, sigurado daw nga dire ine maiimbestigahan ngan ngatanan han mga personnel han NBI in igkokonsidera na kumo mga suspek ha nasabi nga krimen.
Syahan nga nagpahayag an NBI hin kaandaman nga bumulig ha nagpapadayon nga imbestigasyon nga pinangungunahan han Philippine National Police (PNP) ngan Department of Justice (DOJ).
Sumala kan Santiago, andam gihapon an ahensya nga magdumara hin forensic procedure sugad han DNA testing, lie detector test, ngan iba pa nga proseso agud makabulig ha pagtudlok han kamatuuran ha luyo han mga ginbuyagyag ni alyas Totoy.
