TACLOBAN CITY – Iginpahayag ni Senator Mark Villar nga diri pa human iton pagbulig han national government ha mga biktima han bagyong Yolanda.
Sumala kan Villar, bisan kon damo na nga mga kalungganayan iton naihatag han gobyerno ngan dako na an nabag-o han kinabuhi han mga Yolanda survivors napulo katuig tikang maglasurbo an pinakamaukusog nga bagyo ha kasaysayan, padayon la gihap nga aasisteran han national government iton mga taga Sinirangan Bisayas.
Kaupod na dinhe iton pagmando ni Presidente Ferdinand “Bongbong” Marcos ha Department of Human Settlements and Urban Development and the National Housing Authority nga paspasan an paghatag hin mga pabalay ngan titulo ha mga biktima han bagyong Yolanda.
“Natutuwa ako na bumalik na sa normal ang buhay sa Tacloban. Makaasa kayo na tuloy -tuloy ang pagde-develop sa Tacloban at makakaasa kayo na marami pang gagawin ang national government”, pahayag ni Villar ha usa nga interview.
Mababaruan nga han lumingkod hi Villar kumo Secretary han Department of Public Works and Highways (DPWH) ha administrasyon ni anay presidente Rodrigo Duterte, ginpadayon hini an mga struktura nga makakabulig nga protehiran an Tacloban ngan mga kahirani nga bungto ha magkusog nga bagyo.
Ginpadayon hini an Leyte tide embankment project nga nagseserbi nga proteksyon ha storm surge hiton maabot 33,000 nga mga balay ngan struktura tikang ha Palo, Tanauan ngan Tacloban City.
Hi Villar in kaupod ni Presidente Marcos nga nakiusa ha ika-10 nga anibersaryo han Supertyphoon Yolanda han Nobyembre 8.
Pira pa ha mga national officials nga bumisita ha Tacloban City, amo hira Francis Tolentino, Special Assistant to the President Antonio Lagdameo Jr., Environment Secretary Maria Antonia Loyzaga, Interior Secretary Benhur Abalos, and Housing Secretary Jose Rizalino Acuzar.
