TACLOBAN CITY – Kapot na hiton mga kapulisan an umeskapo nga myembro han New People’s Army tikang ha Allen Sub Provincial Jail ha Northern Samar dida han nakalabay nga Oktubre 17.
Una hini, gindakop hi Aljon Cardenas, 19 anyos ,tungod nga usa hiya ha 50 nga mga NPA nga umatake ha police station han Victoria, Northern Samar dida han nakalabay nga Marso 28.
Nakaeskapo daw hi Cardenas pinaagi han pagsaka hini ha unom kametros nga kahitas-on nga perimeter wall, alas 8 han gab-i dida han nakalabay nga Miyerkules.
Sumala kan PCOL Andre Dizon , Provincial Director han Samar Police Provincial Office, naaresto an suspek ha Brgy Dawo, Oquendo District Calbayog City kon diin umuli hiya ha iya pamilya .
Kaupod naman ni Cardenas an iya tatay han maaresto ini han mga otoridad.
Madudugangan naman an kaso han suspek tungod han iya pag eskapo.
Mababaruan nga hi Aljon in naatubang ha kaso nga robbery ngan illegal possession of firearms and ammunition.
