TACLOBAN CITY – Ginklaro han Department of Health (DOH) Regional Office 8 nga dire pa maikokonsidera nga community transmission an nahitabo nga paghitaas han kaso han COVID-19 tikang ha uusa nga barangay ha Basey, Samar.
Una hini, maabot ha 19 nga panibag-o nga kaso han COVID-19 an naidugang ha mao nga bungto kun diin an mga ini puros tikang ha Villa Aurora.
Sumala kan John Paul Roca, tagapagyakan han DOH Regional Office 8, dire community transmission kundi local transmission la ini nga matatawag tungod nga nakikit-an pa man nira an index case.
Gintutuuhan gihapon nga an 19 nga panibag-o nga mga kaso in puros close contact o nakahibalag han nauna nga confirmed cases ha Basey nga hi EV 998 ngan EV 1057.
Nakatalaan naman ini nga imbestigaran han surveillance team han DOH kasugbong an local government unit (LGU) ngan Provincial Health Office han Samar.
