TACLOBAN CITY – Bumisita yana nga bulan an pinakasyahan nga cruise ship nga bisita han Sinirangan Bisayas ha Isla han Kalanggaman, amu an MS Europa 2.
An nasabi nga cruise ship in gintatag-iyahan han German-based Hapag-Lloyd Cruises.
Sumala kan Department of Tourism Eastern Visayas Regional Director, Karen Tiopes, ada ha 455 nga turista ngan 390 nga crew an sakay han nasabi nga ship nga tikang ha Alemania, karuyag sidngon 1:1 an pagtratar han kada bisita.
Usa daw gihapon ine nga sensyales nga high-end an nasabi nga cruise ngan high paying gihapon an mga sakay hine.
Gin tapo naman an mga turista han mga istudyante ngan magturutdo han Taberna National High School ha Kalanggaman pinaagi hin usa nga dance performance.
Pira han mga aktibidad nga ginbuhat han mga turista in an pangarigo ha dagat, stand-up paddle, sun bathing, ngan snorkeling.
Sikat manggud an Isla han Kalanggaman mahitungod han duha hine nga sandbar nga baga-baga hin tamsi an pustura kun kikitaon ha aerial view ngan sugadman ha pino ngan mabusag hine nga baras, matin-aw nga tubig,snorkeling, ngan scuba diving.
Samtang, ine naman na an ika-upat nga pagbisita han MS Europa 2 ha Isla han Kalanggaman tikang dida han tuig-2013.
