TACLOBAN CITY – Patay an usa nga lalaki mahuman ini mawarayan hin kontrol ha gindra-drayban hini nga motor ngan mahulog ha ligid han National Highway ha Brgy. Pinut-an, San Ricardo, Southern Leyte dida han gab-i han mga nakalabay nga adlaw.
Ginkilala an biktima kan alyas Al, 63-anyos, an pangidaron ngan anay kapitan hiton barangay ngan residente han Brgy. San Ramon han nasabi nga lugar.
Basar hiton imbestigasyon, naagi an biktima ha nasabi nga highway ngan tipasaka ini ha kurbada nga parte han karsada kun diin, nawad-an ini hin kontrol ha iya behikulo rason han pagkahulog hini ha ligid han highway nga may kahalarum nga 10-metros ngan nag-angkon hin magkadurudilain nga samad ha lawas.
Ginkikita gihapon nga an kawaray suga ngan kamasirom han nasabi nga karsada in rason kun kay-ano waray maka panginano an biktima.
Samtang, dayon nga gindara an biktima ha kahirani nga ospital pero gindeklara naman ini nga dead on arrival.
