TACLOBAN CITY – Gintikangan na han Bureau of Fire Protection han Sinirangan Bisayas an monitoring han mga christmas lights nga ginbabaligya ha downtown area han syudad han Tacloban.
Sumala kan Fire Senior Inspector Leonil Aurelia, han BFP 8 , mahugot nira nga ginmomonitor adton mga substandard christmas lights agud nga madisiplina an mga magbaraligya labi na yana nga nagtitikahirani na an kapaskuhan.
Mahibabaruan nga an Department of Trade and Industry (DTI) an nagkukumpiska han mga substandard nga mga christmas lights nga ginbabaligya sanglit iginrerefer han BFP ha DTI an ira naman nga nahibaruan nga substandard nga mga christmas lights.
Pahimatngon naman han BFP ha publiko nga maging mabinantayon ha pagpili han mga papaliton nga christmas lights ngan siguraduhon nga diri ini substandard labi na nga usa ini ha mga nagiging rason hin pagkakaada hin sunog.
Mahinunumduman nga han nakalabay nga tuig in waray may nahipatik nga insidente hin sunog mahitungod hin mga substandard lights pinaagi na gihapon han mahugot nga monitoring nga ginbuhat han BFP ngan DTI.
