TACLOBAN CITY – Ginlalauman han pira nga mga opisyales ha syudad nga iglalatag ni Presidente Ferdinand Bongbong Marcos Jr. ha iya syahan nga State of the Nation Address (SONA) yana nga maabot nga Lunes, an iya roadmap para ha masunod nga mga tuig.
Sumala kan Atty. Jerry Uy, konsehal ha syudad han Tacloban, ira ginlalauman nga ha maabot nga SONA han presidente, igprepresentar hini an iya mga plano ngan programa para ha masunod nga unom katuig ha iya termino.
Hangyo hini nga mabatian tikang ha presidente an iya mga specific plans nga pagdudumaraon labi na parte ha economic agenda o an iya plano agud nga makabakdaw an ekonomiya han nasud ha kaluyo han nagpapadayon nga pandemya.
Karuyag gihapon hini nga maging klaro ha pahayag han pangulo an iya magiging mga pitad parte han agrikultura ngan iba pa nga sektor han nasud.
