TACLOBAN CITY – Kwalipikado na nga makakuha hin Sanggunian Kabataan Official Eligibility (SKOE) an mga opisyal han SK nga natudlok dida han tuig-2018 kutob 2022.
Ini sumala kan Civil Service Commission Regional Office VIII Examination Services Division Chief, Atty. Benjie Gelizon.
Gin klaro naman han opisyal nga an sakop la han SKOE in an mga Sanggunian Kabataan Officials (SKOs) nga natudlok ngan nakahuman han ira termino tikang dida han 2018 kutob 2022, sugad han SK Kagawad, SK Treasurer, ngan SK Secretary, kun diin nagin epektibo an Republic Act No. 11768 o An Act Strengthening the Sangguniang Kabataan, Institutionalizing Additional Reforms to Revitalize Youth Participation in Local Governance and by Providing Honorarium, Other Benefits, and Privileges, Amending for the Purpose Certain Sections of Republic Act No. 10742, otherwise known as the “Sangguniang Kabataan Reform Act of 2015, nga nagin epektibo naman did han Hunyo 1, 2022.
Samtang, an dire naman sakop han SKOE an SK Chairperson mahitungod nga sakop na ine ha ilarom han Barangay Official Eligibility (BOE), subay ha Batas Pambansa Blg. 337, mahuman nga igpawaray-bisan han Republic Act No. 7160 or han Local Government Code of 1991.
Gintagan-duon gihapon ni Gelizon nga an mga SK Officials nga mayda ‘good standing’ la an makakuha han eligibility, karuyag sidngon, pwede la gihapon dire tagan o i-grant an hin eligibility an usa nga opisyal kun dire maupay an iya record, labi na kun nagkamay-ada ini hin mga kaso.
Makakakuha naman hin First Level Eligibility o kaparehas han CSE Sub-Professional an mga SK Official.
Samtang, para han presente nga mga opisyales han SK in makakakuha hira han ira eligibility ha oras nga mahuman na an ira termino.
Gin malatumat gihapon han Civil Serive Commission nga sakto la nga nagpapatuman han balaod ngan nagsusunod ha mga kamanduan an ira buhatan ngan waray hira pagbuot ha desisyon han balaod.
