TACLOBAN CITY – Posible pa nga madugangan an mga Sars-Cov 2 Testing Center dinhi ha Sinirangan Bisayas, ini an ginpahayag han PHILHEALTH durante han ira ginbuhat nga Press Briefing.
Dinhi manggud ha Sinirangan Bisayas in mayda la 4 nga mga ospital nga ginkokonsidera nga SARS Cov2 Testing Center nga puydi kadtuan han mga pasyente kun nagkikinahanglan hin bulig may paghisumpay han SARS Cov2.
Man ngani in umabot na ha sobra P235M an ira ginbaydan ha mga ospital sugad han Divine Word Hospital nga aada ha sobra P52M o kun 17,476 nga mga pasyente, Eastern Visayas Regional Covid-19 Testing Center nga aada ha sobra P180M o kun 65,135 nga mga pasyente,OSPA- Farmers Medical Center nga aada ha P619,304 o kun 209 nga mga pasyente, samtang an Salvacion Oppus YÑiguez Memorial Provincial Hospital in aada ha sobra P1M o kun 568 ka mga pasyente an ginbaydan na han PHILHEALTH Regional Office 8.
Sumala naman kan Acislo Militante, Division Chief, Field Operations han PHILHEALTH Eastern Visayas nga puydi pa mag apply an iba pa nga mga ospital ha rehiyon basta magsunod la han mga ginpapatuman nga mga protocols o an aludayday para maaccredit hira.
