TACLOBAN CITY – Gintikangan na han mga kapulisan ha probinsiya hiton Leyte an mahugot nga implementasyon han “No Take” ngan “One Strike policy” nga nagpapanuyo nga mapuypoy an problema ha illegal gambling.
Sumala kan Pol. Maj. Margarito Salaño, tagapagyakan han Leyte Police Provincial Office (LPPO) an mga palisiya in tikang ha direktiba ni PNP Chief Gen. Archie Gamboa nga nagmamando ha ngatanan han mga provincial directors, command groups, hepe han mga city ngan municipal police station nga mas pahuruhuguton pa an operasyon ala kontra ha illegal gambling.
Ha ilarom han One Strike Policy, an hin-o man nga station commander nga pakyas ngan babalewarayon la an illegal gambling ha ira tagsa tagsa nga nasasakupan in dayon nga igre-relieve ha ira mga pwesto.
Samtang, ha ilarom naman han No Take Policy mahugot nga gindidire ha mga kapulisan an pagkarawat hin protection money o mga regalo tikang ha mga gambling operators.
May kakaatubangon liwat nga kaangayan nga kaso iton mga pulis nga mapapamatud-an nga nagtalapas han mao nga palisiya.
