TACLOBAN CITY – Plano han Philippine Army ngan lokal nga pan-gobyernuhan han Matuguinao, Samar nga pasakahan hin kaso ha ilarom han Anti Terrorism Law an mga opisyales han mga barangay nga nasuporta ha mga New People’s Army (NPA).
![](https://img.bomboradyo.com/tacloban/2021/02/NTF-ELCAC.jpg)
Sumala kan Lt. Col. Jasper Justito Pecson, Commander han 19th Infantry Battalion, namonitor nira nga may pipira nga mga barangay officials ha bungto han Matuguinao nga naghahatag hin suporta ha mga komunista nga rebelde.
Kun matirok na nira an mga kinahanglan nga mga ebidensya in plano han mga kasundaluhan nga pasakahan hin kaso an mao nga mga opisyales han barangay.
Ha ilarom manggud han Section 15 han Anti Terrorism Act, an hin-o man nga local government official nga mapapamatud-an nga nasuporta ha bisan ano nga klase hin pamaagi ha mga rebelde in pwede nga umatubang ha kaso nga administratibo ngan penalidad o sirut nga pagkatanggal ha serbisyo.
Pwede gihapon nga kanselahon an civil service eligibility hini, tanggalon an retirement benefits ngan sugadman diskwalipikasyon hini ha pagdalagan ha anoman nga posisyon o public office.
Samtang, ginpahayag naman ni Matuguinao Mayor Aran Boller nga ha 20 nga mga barangay nga sakop han Matuguinao, pito han mga tay-aw nga brangay an mayda sightings hin mga NPA tungod nga an mga ini in strategic areas ngan boundaries han Samar, Eastern Samar ngan Northern Samar provinces.
Kalakip han mao nga mga barangay an Del Rosario, Ligaya, Carolina, San Roque, Inubod, Rizal ngan Mahayag.Utro naman nga gin-aghat ni Boller an mga molopyo han ira bungto nga ig-undang na an pagsuporta ha mga rebelde nga NPA.