ABUYOG, LEYTE – Usa nga menor de edad nga biktima han Online Sexual Abuse and Exploitation of Children (OSAEC) an malinangpuson nga narescue han mga otoridad ha gindumara nga joint operation han mga otoridad ha Sitio Laray (Zone 1), Brgy. Bunga, Abuyog, Leyte.
Sumala kan Abuyog Municipal Police Station Women and Children Protection Desk PNCO PSSgt. Blanche Lumagod Bolito, ini nga operasyon in konektado han gindumara nga operasyon dida han Pebrero 18 ha kaparehas la gihapon nga lugar.
Basar han mga nakuha nga ebidensya dida han nauna nga operasyon, in nakagtudlok an mga otoridad hin usa pa nga posible nga biktima han online sexual abuse nga nagresulta hin pagdumara han ikaduha nga operasyon.
Ha ikaduha nga operasyon, nasalbar an 10-anyos nga biktima nga babaye, kun diin an lugar nga kinamumutangan hini in harani la gihapon han syahan nga lugar nga gindumaraan an operasyon.
Nahibaruan gihapon nga biktima in sangkay han mga nauna nga narescue nga ginbabaligya ha mga langyawanon nga ‘costumer’ nga aadto ha iba nga nasud.
Ha pagkayana in ada ha kostudiya han Department of Social Welfare and Development an biktima ngan ginpapailarom hin mga interbensyon nga makakabulig hini agud mawara an trauma ngan kahadlok nga inaabat hini.
Dire pa gihapon igintutugot an pagbisita ha mga biktima, pero igintutugot naman an kumunikasyon ha mga ini basta mayda katugutan tikang ha otoridad.
Nanawagan naman ini ha mga kag-anak nga magpakakag-anak, ighatag an katungod han kabataan nga magin bata, atimanon permamente, proteheran, ngan higugmaon an mga ini.
