TACLOBAN CITY – Nakaghatag hin kahadlok ha publiko an usa nga ginbayaan nga maleta ha Abucay Terminal ha Tacloban City dida han nakalabay nga adlaw.
Sumala kan Abucay Police Station 2 Station Commander, PMAJ Shenna Layog, nga gintahapan nga an ginbayaan nga maleta ha mao nga terminal in may sulod nga bomba, mahitungod nga nakaputos ini ngan nakakandado rason han pagkabaraka han molupyo.
Dayon naman nga ginkordohan an lugar ngan nakipag-koordinar an ira opisina ha ira Explosive Ordinance Disposal o EOD agud mapanginano kun mayda sulod nga bomba o paburuthon an maleta. Han pag-abriha na han bagahe, nadiskubrehan nga puros basura an sulod.
Basar gihapon han ira pamakiana, nasabtan nga gintatag-iyahan ini han usa nga indibidwal nga mayda problema ha panhunahuna.
Samtang naghaphimatngun naman an opisyal ha publiko nga dayon nga igreport ha ira opisina kun may masususpetsaran nga butang agud malikyan an posiblidad han kadelikaduhan.
