TACLOBAN CITY – Nag-lunsar hin Oplan Byaheng Ayos 2022 an Land Transportation Franchising and Regulatory Board LTFRB-8, bago nga aktibidad para hiton tikaarabot nga kapaskuhan.
Sumala kan Veronica Reposar, Transportation Officer-2, LTFRB Regional Office 8, an panuyuan hine nga bago nga aktibidad in para masigurado nga maupay an magigin kabutangan hiton pasaheros nga mauli ha ira tagsa-tagsa lugar yana nga Pasko.
Dugang pa ni Reposar nga ine nga aktibidad in parehas gihapon han ira mga nakalabay nga Oplan, kun diin ginkikita hiton mga tiglawas han LTFRB an mga sarakyan kun nasunod ba an mga ine ha mga polisiya hiton LTFRB.
Ginkikita gihapon hine an mga terminal han mga sarakyan kun mayada ine maupay nga sistema sugasd hiton pagkakamay-ada priority lane para ha mga PWDs, mga burod, ngan senior citizens.
Labot la hiton inspeksyon han mga sarakyan ngan mga terminal, gin-aaghat gihapon hine nga Oplan an mga manarakay nga sumunod hiton health protocols sugad man hiton pagsusul-ot hiton face masks ha sulod hiton mga sarakyan agud malikayan iton transmission han COVID-19.
