TACLOBAN CITY – Arestado an usa nga lola mahuman nga maaktuhan ngan makuhan hin maabot walo nga mga pusil hin magkadirudilain nga kalibre ha syudad ha Ormoc.
Ginkilala an mao nga senior citizen nga suspek nga hi Janet Bernabe, 61 anyos an pangidaron, residente han San Antonio Village, Matina, Davao City.
Sumala kan Pol. Maj. Rex Cantillep, tagapagyakan han Ormoc City Police Office, tisakay na unta an mao nga suspek ha bus tikang ha terminal han Ormoc tikadto ha Davao han matiktikan ini ha gindumara nga inspeksyon han Civil Security Unit ngan nakit-an an dara-dara hini nga walo kaarmas nga ginputos la hin dyaryo.
Kaupod ha mga nakuha nga armas tikang ha suspek an duha nga 38 caliber revolver, lima nga 45 caliber pistol, ngan usa nga 9mm caliber.
An pamahayag ni Pol. Maj. Rex Cantillep, tagapagyakan han Ormoc City Police Office
Ha pagkayana in naatubang na ha kaangayan nga kaso an mao nga senior citizen ngan padayon naman an imbestigasyon han mga kapulisan bahin han motibo hini ha pagdinara-dara han mao nga mga armas.
