TACLOBAN CITY– Ginpahibaro han buhatan hiton Tacloban City Sports, nga nag-alutaga an lokal nga pangobyernohan han syudad hin mga incentives para ha mga atleta nga nakakuha hin gold, silver ngan bronze ha kahuhuman la nga EVRAA Meet 2023.
Sumala kan Michael Dela Peña, HeadTacloban City Sports, nga mayda kabug-usan nga 187 nga mga atleta an nakipag-kompitensya han mao nga paisan-isan, kun diin maabot dinhe ha 38 an nakaka-kuha hin gold medal, 68 silver, ngan 81 bronze.
Dugang pa han mao nga opisyal, nga an kada nakukuha nga medalya in mayda kabalyo nga kantidad, sugad han gold medal nga may kabalyo nga 7K, silver-5k, bronze 3k.
Gintagan naman hin duon han mao nga opisyal, nga an naka-alutaga nga budget han syudad in gawas ha naka-alutaga nga incentives nga tikang ha DepEd, karuyag sidngon doble an makaka-rawat han mga atleta nga nakakuha hin mga medalya.
Ginpahibaro naman hine nga pananglitan naka-kuha an usa nga atleta hin duha nga medalya, madodoble gihapon an iya makakarawat nga incentives, karuyag sidngon magigin times two an makakarawat nga money incentives han mao nga atleta.
