TACLOBAN CITY – Plano liwat han LGU han Kananga nga pumalit hin bakuna tikang ha Astrazeneca.
Ha usa nga pahayag, ginkumpirma ni Kananga Mayor Matt Torres nga nakikipaghimangraw na Kananga Covid-19 Municipal Task Force ha AZTRAZENECA kasumpay han ira plano nga pumalit hin 40,000 ka-doses COVID- 19 vaccine para ha ira mga molopyo.
Ini nga ihap in igdudugang ha bakuna nga ighahatag han national government ha ira munisipyo.
Masulod hin usa nga tripartite agreement iton lokal nga pangubyernuhan han Kananga, Leyte kaupod an mao nga pharmaceutical company, sugad man an DOH kaupod an IATF.
Magkakaaada naman hin meeting an LGU han Kananga ha Astrazeneca ngan target hini nga maideliver an bakuna ha ikaduha nga semana han Hulyo.
Uunahon ha paghatag han bakuna an 18 anyos tipaigbaw, mga senior citizens ngan mga frontliners.
Mababaruan nga an Kananga, Leyte in usa nga first class municipality nga may populasyon nga 56,575 katawo subay 2015 census of population.
