TACLOBAN CITY – Mas nagtikadamo an mga insidente hin paglaprak han tuna o landslides ha mga lugar ha probinsya han Leyte nga naigo han makusog nga paglinog han nakalabay nga bulan han Hulyo.
Sumala ha Carlito Tuballa, assistant regional director for Technical Services han Department of Environment and Natural Resources (DENR) 8, dumamo an ihap han mga kaso hin landslides ha probinsya mahuman an nanabo nga paglinog han nakalabay nga Hulyo 6 ngan pira nga mga aftershocks.
Pira nga mga mountain ranges ha bungto han Kananga, Burauen, Ormoc, Jaro ngan Carigara an nagkadidistroso mahitungod han mao nga mga landslides.
An mao nga mga landslides in makikit-an ha may Maharlika Highway ngan ha may dalan tikadto Sta. Fe, Alangalang ngan Jaro.
Nahibaruan ini han pira nga mga geologists mahuman an ira ginbuhat nga geohazard assessment ha mga slide-hit areas.
Samtang, mahinunumduman nga upat an patay ngan sobra gatos an samaran mahuman an nanabo nga 6.5 magnitude nga linog kun diin ginsundan liwat ini han magnitude 5.9 nga linog han Hulyo 10, ngan magnitude 5.1 liwat han Agusto 23 kun diin sumentro ini ha Albuera, leyte.
