TACLOBAN CITY – Umentado na gihapon an presyo han pira nga panakot ha merkado-publiko han syudad han Tacloban sugad han kamatis, sibuyas, ngan siling labuyo.
Sumala kan Tacloban City Agriculture Office Head, Romelo Anade, kakulop han aga-aga, Enero 14, in nagdumara hin panginano ha mga presyo han utanon, isda, karne, panakot, ngan iba pa nga mga prime agriculture commodities an price monitoring team han City Agriculture Office han syudad.
Ha gindumara nga monitoring, nagawas nga mayda gudman pipira nga mga produkto an nag-umento an presyo kun diin mahitungod liwat ha damo nga rason.
Syahan, an pag hamubo han produksyon han mga produkto mahitungod han kataghom ngan uuran nga gin aabat ha pagkayana.
Ikaduha, kahuhuman pala han bulan han Disyembre o holiday season kun diin nagkaubos-ubusan hin mga suplay dida han nasabi nga bulan rason gihapon nga kulang ngada ha waray pa stock han mga produkto.
Ngan ikatulo, damo nga mga kalamidad an lumabay ha nasud sanglit apektado gihapon an bug-os nga produksyon ha Pilipinas ngan dire la an Sinirangan Bisayas an nagkukulang ha suplay.
Ine nga mga rason in pira la ha mga nakit-an nga ‘rason’ ha pag-umento han presyo han pira nga mga papliton ha merkado.
