TACLOBAN CITY– Ginklaro han Department of Education Samar Division, an kasumpay ha nagsarang ha social media nga mga tinapay nga gin-aaligar nga ginlabog la ha ligid hiton karsada.
Sumala kan Department of Education Samar Division, Information Officer, Gerry Ocenar,may pira nga mga eskwelahan ha Samar, nga benepisyaryo hiton School base Feeding program, kun diin ine nga programa in naghahatag hin mga tinapay sugad hiton Nutribun.
Dugang pa ni Ocenar, an suplier in taga Tacloban, ngan usa ha mga responsibilidad han supplier in makaghatag hin maupay nga kalidad hin tinapay ha mga benepisyaryo nga eskwelahan.
Ginmalatumat hine nga han nakalabay nga Enero 6, samtang gindedeliver an mga tinapay ha mga recipient, naguban an makina han truck nga mayda sulod nga mga tinapay, matungod gihapon han kalain han panahon.
Ha mao nga panhitabo, nagdisisyon nala an supplier nga igbalik an mga tinapay matungod nga atrasado na, ngan na-uranan gihapon an mga ine ngan dire na maupay an kalidad para igpanhatag o igkunsumo han mga kabataan.
Gintagan duon ni Ocenar, tungod nga dire na pwede igkonsumo an tinapay napagdisisyunan han supplier nga ig-dispose nala ine, ngan samtang naghuhulat hin truck nga magkakarga han nasabi nga mga sinako nga karan-on, ginkalat ine hiton mga ka-ayaman nga nagin resulta naman han pagsarang hine ha ligid han karsada.
