TACLOBAN CITY – Aksidente nga nahulog an landing gear han Philippine Air Force C-130 nga eroplano ha ligid han runway han Catarman Northern Samar Airport, samtang ginmamaniobra an nasabi nga eroplano para ha 180-degree nga pagliko para ha threshold han nasabi nga airport.
Sumala kan Lady Lourdes Fatima Obiña, Information Officer han Civil Aviation Authority of the Philippines (CAAP) Regional Office 8, nag-unload hin 25 drums han fuel an mao nga eroplano para ha mga kasundaluhan han Northern Samar.
Matungod ha mahumok nga tuna durot han waray wantas nga pag-inuran an rason han aksidente, nga pagkakahulog han eroplano ha runway han paluparan kun diin maliko unta ine.
Nagdumara naman hin dayon nga aksyon an mga hintutuinan han paluparan, para matangal an mga landing gear nga nagkahudlog ha eroplano.
Waray naman may nahireport nga nasamaran ha nasabi nga insidente.
Mahuman an mahugot nga inspeksyon in nakalupad gihapon ine ngan talwas nga naka-abot ha Mactan, Cebu.
