TACLOBAN CITY – Patay an usa nga lalaki mahuman nga tigbason han iya kalugaringon bugto ha Brgy. Lower Hiraan, Carigara, Leyte.
Ginkilala an biktima nga hi Jessie Bactol, 32 anyos an pangidaron.
Samtang nakilala naman an suspek kan Efren Bactol, 37 anyos an pangidaron ngan magurang nga bugto han biktima.
Sumala kan PSMSgt. Niño Gervacio, Imbestigador han Carigara PNP, subay ha ira inisyal nga imbestigasyon nga sumulong an biktima ha panimalay han iya manghod kun diin ini in nan-ayat hin away.
Matungod nga parehos nakainom an mao nga magbugto in nagkabatunay an mga ini nga nagresulta ha pagkuha hin sundang han suspek ngan tigda nga gintigbas ha li-og an iya manghod rason han dayon nga kamatayon hini.
Boluntaryo naman nga sumurender ha mga kapulisan an suspek nga yana in naatubang ha kaangayan nga kaso.
