TACLOBAN CITY – Samaran an usa nga lalaki mahuman nga pagbun-on han iya kalugaringon bugto ha Barangay Caraycaray, Naval Biliran.
Ginkilala an biktima kan Mark Montes, 26 anyos an pangidaron.
Samtang nakilala namana an suspek kan Francisco Montes, 32 anyos an pangidaron, magurang nga bugto han biktima.
Sumala kan PSSgt. Heldeyardo Enaje Jr., imbestigador han Naval MPS, subay ha inisyal nga imbestigasyon nga umuli nga hubog an suspek ha ira panimalay ngan nagpinantumboyon ha iya mga kabugto-an kun diin nagkamay-ada hira hin mapaso nga komprontasyon han biktima nga nagresulta naman ha pagkuha hin kutsilyo hini ngan tigda nga ginbuno an iya manghud.
Nag-angkon hin binun-an ha may dughan nga parte an biktima nga yana in padayon nga nagpapaupay ha ospital.
Dayon naman nga nadakop an suspek nga yana in napasakahan na hin kaangayan nga kaso.
