TACLOBAN CITY — Nakit-an an usa nga lalake nga biktima hin hit and run ha usa nga highway ha Brgy. Santo Niño Sulat, Eastern Samar nga grabe an gin-angkon nga mga samad ha lawas.
Ginkilala an biktima kan Nelson Balesi, 34 anyos, inasaw-an, parag-uma ngan nag-uukoy la mismo han nasabi nga lugar.
Sumala kan PLt Antonio Docena, Chief of Police han Sulat MPS, basar ha inisyal nga imbestigasyon, nakit-an han mga witness an biktima ha nasabi nga highway nga nakahigda ngan grabe an gin-angkon nga mga samad ha lawas.
Dayon naman ginrespondihan an mao nga insidente ngan gindara an biktima ha pinkaharani nga ospital pero gindeklara ini nga dead on arrival matungod ha mga gin-ankon nga mga samad ha lawas.
Nakikit-an naman ha imbestigasyon han mga kapulisan nga nadanas an mao nga biktima ha nasabi nga kalsada hinungdan han pagka-angkon hin grabe nga mga samad ha lawas.
Ha pagkayana in nagpapadayon lagihapon an imbestigasyon han mga kapulisan ha kun anu gud nga behikulo an nakasagi han biktima nga nagresulta han kamatayon hini.
