TACLOBAN CITY – Usa nga kaso hin pamusil an nahipatik ha sulod han usa nga establisyemento ha Brgy. Dagum Calbayog City.
Ginkilala an biktima kan Dennis Alfonso, 21-anyos an pangidaron, helper han establisyemento, ngan residente han Brgy. Libucan Dako, Tarangnan Samar, samtang ginkilala naman an suspek kan Romeo Marquez, 24-anyos an pangidaron, ngan residente han Purok 5, Brgy. Dagum Calabayog City.
Basar han insyal nga imbestigasyon, natukdaw an biktima ha gawas han ira barracks han tigda la nga umabot an suspek ngan humugot dayun hin psuil tikang ha iya hawak ngan ginpamusil an biktima maka-duha kabeses pero waray ine makaigo han biktima.
Dayun naman nga kumalagiw an suspek tipakadto ha mabukid nga parte hiton Brgy. Dagum Calbayog City.
Nakuha naman ha lugar han insidente an usa nga basiyo han bala kun diin igpapailarom ine ha Cross Matching Examination.
Padayun naman an gindudumara nga hot pursuit operation han mga kapulisan ngan nakaandam na gihapon an kaso nga igpapasaka ha suspek.
