TACLOBAN CITY – Ginpahayag han Commission on Population (POPCOM) Regional Office 8 nga humabubo an kaso han teenage pregnancy ha Sinirangan Bisayas.
Sumala kan Reyan Arinto, tagapagyakan han POPCOM Region 8, basar ha datos nga ira nakuha in maabot ha 10% an gin-iban han teenage pregnancy cases Sinirangan Bisayas.
Ini daw in matungod ha ira mga ginpakurukusog nga mga programa ngan tungod na gihapon han pandemya kun diin dire gud nagpapakagawas an mga kabataan ha ira tagsa panimalay.
An mao nga datos in ginpagawas han Philippine Statistics Authority (PSA) tikang dida han Oktubre 2019 tubtob Disyembre 2020.
Mababaruan, dida han 2020, nagawas nga an mga kabataan nga nag-eedad 10-14 anyos in mayda 79 kaso nga nagburod, ha mga nag-eedad 14-17 anyos in mayda 2,300 cases samtang ha18-19 anyos in mayda kaso nga maabot 6,495 cases.
Nagpahinumdom naman an mao nga buhatan ha ngatanan nga mga LGUs nga pakusgon pa an mga programa bahin ha adolescence development agud mapugngan ngan deri magdamo an kaso han teenage pregnancy.
