TACLOBAN CITY – Doble an nagin paghitaas han kaso han suicide incident ha bug-os nga rehiyon dida han nakalabay nga tuig-2023.
Sumala kan Jelyn Lopez-Malibago, Information Officer hiton Department of Health Regional Office VIII, dako an deperensya han ihap han kaso tikang han tuig-2020 ngan tuig-2023 kun diin haros upat ka-doble han ihap han kaso dida han 2020 an nagin ihap han kaso dida han 2023.
Dida han tuig-2020 in mayda 24 nga kaso han pagpapakamatay kun diin sumaka naman ine ha 26 nga kaso dida han tuig-2021, nagin 49 dida han tuig-2022, ngan pinakahitaas naman an nakalabay nga tuig-2023 kun diin umabot ha 95 an nagin kaso han pagpapakamatay.
Para han presente nga tuig-2024 in mayda naman na daw mga report kasumpay han pagpapakamatay pero ginhuhulat pa han ira buhatan an inisyal nga ihap tikang ha mga Local Government Units.
Kaurugan naman daw han ira nakakarawat nga rason han pagpapakamatay in mahitungod han mga personal nga problema, mental health issues, alcohol intoxication ngan substance abuse, ngan an iba naman in waray natudlok nga rason han pagpapakamatay.
Samtang, nahipatik gihapon nga kaurugan han mga nagpakamatay dida han nakalabay nga tuig in kalalakin-an kun diin umabot ha 52 an ihap, 26 naman an kababayen-an, ngan 17 naman an waray kahibarue.
