TACLOBAN CITY – Nagpahimatngon an Bureau of Fisheries and Aquatic Resources Regional Office 8 ha publiko, nga likayan la anay nga manguha hin mga pangti-on ha kadagatan nga sakop hiton Matarinao Bay ngan Guiuan Eastern Samar.
Sumala kan Christine Gresola, tagapagyakan han BFAR-8, nga nagpalusad hin advisory an ira ahensya, agud nga makaghatag hin pahimatngon ha ngatanan nga dire la anay manguha, kumaon o magkunsumo hin mga SHELLFISH and Acetes sp. or “Alamang” kun an mga ine in tikang ha kadagatan hiton Matarinao Bay ngan an sakop hine in an (General MacArthur, Hernani, Quinapondan, and Salcedo, Eastern Samar).
Ginbabawalan la anay han mao nga buhatan an mga parupangisda nga manguha hin mga pangti-on ha kadagatan nga positibo han red tide toxins.
Dugang pa han mao nga opisyal, nga pananglitan mayda an ira buhatan mahibaruan nga nagbabaligya hin pangti-on tikang ha mga nasabi nga kadagatan nga positibo han red tide, in dire mag-aalang an ira ahensya nga kumpiskaron an mga ine.
